bng.xinzodalimia blog

Alleamento de masas comúns

2005-11-27T16:33:00.000+01:00

No pleno do 25 de novembro foron aprobadas polo grupo de goberno do PP as bases para allear 25 parcelas propiedade do Concello ubicadas todas elas nas proximidades da vila. Son terreos que oscilan entre os 180m2 do máis pequeno e 6300m2 do máis grande. A valoración que se fixo destas parcelas achégase aos 326mil euros.

Dende o BNG rexeitamos esta venda indiscriminada de patrimonio municipal que se vai producir sen ter en conta nengún outro criterio máis ca o simplemente recadatorio. Coidamos que sería necesario estudar cada caso e valorar a posibilidade que cada un destes terreos poidera ter nun futuro para, por exemplo, ubicar instalacións ou servizos municipais ou calquera outra finalidade de interese xeral dos viciños.

O Mosteiro de Trandeiras

2005-10-17T10:45:00.000+02:00

Como todos sabedes o Mosteiro do Bon Xesús de Trandeiras é un dos monumentos máis siñificativos do noso concello. Dada a súa importancia temos o deber de recuperalo e conservalo para poder seguir disfrutando del.

Agora mesmo o seu estado é bastante lamentable. A igrexa foi obxecto dunha restauración (non exenta de polémica) hai uns anos, mais o resto do conxunto segue a deteriorarse.

Diante da falla de viabilidade das dúas alternativas que se plantexaron dende o PP, lembramos xeriátrico ou parador de turismo, a día de hoxe non hai perspectivas sobre que destiño darlle a esta construcción emblemática. No pleno extraordinario do pasado 14 de outubro propuxemos que podería ser acertado convocar un concurso de ideas para recoller suxerencias sobre posibles usos para o Mosteiro. Adiantándonos un pouco a esta posibilidade desexaríamos que nos achegásedes as vosas ideas ao respeito. ¿Que se pode facer co Mosteiro de Trandeiras? ¿Que suxerides?. As respostas podedes envialas ao noso email: info@bng-xinzo.org, ou deixalas aquí como comentarios a este post. Moitas grazas.

Pleno extraordinario outubro 2005

2005-10-14T22:30:00.000+02:00

Hoxe celebrouse un pleno extraordinario con 5 puntos na Orde do Día.

O primeiro era a demisión de Gonzalo Iglesias Sueiro como concelleiro do PSdeG-PSOE logo de acceder ao cargo de Delegado da Consellería de Educación nas pasadas datas. Na súa despedida leu un breve discurso e houbo palabras de agradecemento por parte de tódolos grupos. Dende o BNG de Xinzo desexámoslle sorte e éxitos na súa xestión.

Despois pasamos a tratar os seguintes temas, que vos debullo agora brevemente:

Proxecto para resolver o problema de abastecemento no rural en épocas de sequía

Despois da prolongada seca que estamos a padecer o nível da presa de Gudín está baixo mínimos e ameazaba con deixar sen auga aos pobos que abastece. Para solucionar esta continxencia (para o futuro) Aquagest propuxo unha solución consistente, basicamente, en bombear auga dende o Xinzo cara a presa empregando as mesmas tuberías de baixada. É unha solución sinxela e aparentemente viable xa que noso subsolo é farturento neste recurso. Segundo a propia Aquagest o orzamento para a obra é duns 154 mil euros, que se lle van solicitar á Consellería de Medio Ambiente.

Novo Cuartel da Garda Civil

Parece ser que non hai consignada partida para esta obra no Proxecto de Orzamentos do 2006. Non fai falla lembrar o estado deplorable destas instalacións, impropias dunha vila como a nosa. Había un compromiso (incumprido) de comezar neste ano que xa remata e, de non haber cambios, leva trazas de non comezar tampouco no 2006.

Mosteiro de Trandeiras

Aprobouse unha proposta para solicitar da Xunta e do Goberno Central 250.000eu para facer obras urxentes de consolidación neste monumento. As propostas do alcalde de convertilo en hotel ou xeriátrico non semellan moi viables e faise necesario tomar algunha decisión ao respeito para traballar cun obxectivo.

Tamén se acordou solicitar de Medio Rural axudas ao abeiro do R.D. 11/05, de 22 de xullo, para paliar os danos provocados polos incendios do pasado verán.

Pleno ordinario agosto 2005

2005-08-25T10:30:00.000+02:00

Neste pleno adxudicáronse obras para a construcción do novo Xardín de Infancia e ampliación da Casa do Concello á empresa Ganade y Marra, S.L. A ámbolos dous concursos se presentaron dúas ofertas, a da citada empresa e a de ALEA, S.L. Unha vez analizadas, as condicións ofertadas por Ganade y Marra resultaron netamente superiores:

Xardín de Infancia
*Prezo: 696.000,00 eu
*Prazo de execución: 4 meses
*Aumento de obra sobre a proxectada: 108.520,00 eu
*Melloras estéticas e funcionais: 22.250,00 eu

Casa do Concello
*Prezo: 343.000,00 eu
*Prazo de execución: 3 meses
*Aumento de obra sobre a proxectada: 55.220,00 eu
*Melloras estéticas e funcionais: 17.250,00 eu

En definitiva todos estivemos dacordo en que era a oferta máis ventaxosa xa que en conxunto disporemos duns 27 millóns de pesetas extra para mellorar estas obras.

Non obstante, tamén coincidimos a oposición en conxunto, en reclamar unha revisión das bases de contratación para futuras adxudicacións de xeito que se favoreza a competencia entre empresas, o cal sempre resultará en interés do concello.

Pasando a outro tema, o noso portavoz apresentou unha moción de urxencia referida á folga da Mancomunidade instando ás partes a resolver o conflito mediante o diálogo. Despois dun debate e dunha pequena modificación foi aprobada por unanimidade por tódolos grupos.

¡¡¡Xa están abertas as piscinas!!!

2005-08-20T19:15:00.000+02:00

Despois de tres anos sin poder disfrutar destas instalacións hoxe por fin abriron as piscinas municipais.

Sí, é verdade que levamos tres anos sin elas; sí, é verdade que o señor alcalde prometeu que estarían operativas o 1 de xullo e estamos a 20 de agosto; sí, xa sei que foi necesario adxudicar a construcción dos vestiarios a toda presa e axudar á empresa coa brigada municipal; sí, tamén sei que xa casi está a rematar o vran... mais ¡¡¡que importa todo isto!!, ¡¡¡xa pertence ao pasado!!! O importante é que as piscinas están aí e para o ano que ven os veciños teñen a casi completa seguridade de poder bañarse todo o vran.

Velaí outro exemplo de brillante xestión. Celebrémolo.

Todos somos iguais

2005-06-02T11:30:00.000+02:00

Unha "reflexión" que se escoita pola rúa moi a miúdo, especialmente nestes días nos cales a política cobra especial relevancia pola próxima cita electoral, é que da igual votar a uns ou outros porque "son todos iguais". Cando oiades isto é que estades casi seguro diante dun votante vergonzante do PP que así se consola da súa propia incapacidade, falta de criterio e falta de coraxe para revelarse diante da situación que crean os dirixentes deste partido máis preocupados pola súa situación persoal que por outra cousa.

Eu, persoalmente, vou explicar o que me diferencia a min dun votante ou simpatizante medio do PP:

Eu estou no BNG por ideoloxía. Un do PP está porque é donde lle din que ten que estar.
Eu estou no BNG porque podo e porque quero. Un do PP está para tirar algunha ventaxa do poder.
Eu estou no BNG porque non preciso nada. Un do PP está porque precisa "algo".
Eu creo que a política e o poder son instrumentos para mellorar a situación dos pobos. Un do PP cree que son instrumentos para mellorar a situación persoal e a dos amigos e "achegados".
Se o BNG non gaña unhas elección ó día seguinte eu vou seguir sendo o mesmo. Se o PP perde unhas eleccións ó día seguinte moita xente teme polas súas fabas.
Eu vou de interventor ou apoderado porque me apetece. Un do PP vai porque se non non entra no concello, ou na deputación, ou en calquera dos organismos que controlan.

Para rematar convídovos a facer un experimento moi sinxelo: pensade en aquela xente que coñecedes do BNG, quen son, que fan, onde están, etc. e facede o mesmo cos do PP. Logo tirade as vosas propias conclusións.

Reflexións pre-electorais

2005-06-02T00:58:00.000+02:00

Estamos a vivir unha situación inédita na historia recente do noso país. Por vez primeira hai esperanzas fundadas de cambio no governo de Galiza. Despois de 15 anos de peste Fraga, de xestión nula e fraudulenta cos intereses dos cidadáns, é o momento de rematar con isto e deixar atrás o lastre pesado do PP, de rexeitar e esquecer as súas ameazas e a visión negra e pesimista que queren vendernos do noso futuro.

Nestes todos anos de "avance vertixinoso" e "modernización sin igual", segundo dí Fraga claro, non conseguimos sair dos derradeiros postos en tódolos indicadores que miden o benestar. A máxima aspiración hoxe do PP é que sigamos a recibir os fondos que nos veñen de Europa, ¿para que?, ¿para que serviron tódolos cartos que recibimos ata hoxe?. Fraga fala dunha "supergalicia", que non verá, cando non temos nin Galiza. Temos o peor inimigo na propia casa, un presidente (con minúsculas) que se empeña en rebaixar tódolos días a categoría da institución que preside e, consecuentemente, a categoría de todos nós como pobo.

Fronte a esta situación, a este negativismo escurantista do PP que só pensa en manter a súa estructura caciquil, dende o BNG apoñemos un proxecto positivo e optimista que cree en Galiza como PAÍS, nas súas posibilidades, na súa xente, no seu agro, no seu mar, na súa cultura,... agora só falta abrir os ollos e querer ver.

Novo préstamo de 485 mil euros

2005-05-24T10:45:00.000+02:00

No pleno extraordinario celebrado a tarde do luns, 23 de maio, foi aprobada, cos votos favorábeis do PP unha operación de préstamo por un importe de 485.000 euros. Estes cartos xa estaban recollidos nos orzamentos deste ano e irán destiñados a financiar as obras nas piscinas, a gardería a rúa da Sé e Sta. Mariña e o Parque de Bombeiros.

O principal argumento do alcalde á hora de xustificar este préstamo está na inevitabilidade de acudir ao mesmo para poder executar as obras, que doutro xeito non poderían ser abordadas.

Nós votamos en contra desta operación porque incrementa a xa abultada débeda do Concello, siñifica a constatación palpable do incumprimento (máis unha vez) das promesas electorais do PP, tenta salvar a cara deste goberno para chegar ao final do mandato e deixa un novo problema que teremos que afrontar os que veñamos detrás.

Rede de saneamento (II)

2005-04-07T22:00:00.000+02:00

Hoxe en Comisión informativa técnicos de Aquagest e Norcontrol deron conta dos motivos dunha modificación aparentemente tan substancial como a que expliquei no anterior post.

O representante de Aquagest defendeu a validez do proxecto redactado inicialmente poñendo en claro un concepto que pasara desapercibido. Ese proxecto (que custou 10 millóns de pts.) era un Plan Director, que analizaba a situación existente e, baseandose nun modelo matemático, propoñía unha solución.

Cando se pensou en materializar esa obra a Xunta encomendoulle a redacción do Proxecto de Execución a Norcontrol. Neste caso os técnicos de Norcontrol tomaron como punto de partida o estudo recollido no Plan Director de Aquagest, mais optaron por outra solución diferente.

Tecnicamente a explicación parece incontestable: o Plan Director requería dun desenrolo, independentemente de a quen lle fora encargado, e neste caso Norcontrol optou por unha solución máis ambiciosa e máis cara.

En calquera caso quedaron algunhas dúbidas no ar:

Por que os políticos locais tiveron/tivemos sempre a idea de que o traballo de Aquagest constituía, en si mesmo, un documento final en canto á solución a aplicar e máis ó seu custo?
Por que se chega a solucións finais tan diferentes partindo dos mesmos datos e aplicando os mesmos criterios?

Finalmente dicir que, dun xeito ou doutro, o interesante é que se realice esta obra e, unha vez rematada esta primeira fase se vaian abordando as sucesivas.

Pleno ordinario marzo 2005

2005-03-18T13:30:00.000+01:00

Outros asuntos tratados no Pleno do 17 de marzo (a parte do tema da rede de saneamento, que vai nun post aparte) foron:

Aceptar a cesión por parte de Xestur dunha parcela (a nº3) no Parque Empresarial.
Ceder á Mancomunidade unha parte desta mesma parcela para a instalación do 'Ponto Limpo': aquí criticamos a falla de criterio e a mala xestión do Concello xa que se tentou instalar este servizo noutros sitios e sempre se atoparon co rexeitamento veciñal.
Alugar a Telefónica un terreo no recinto da EDAR para que traslade alí a antena que ten na R/ Ladeira: disto depende a construcción da Gardería, outro exemplo de infraestructura que se retrasa no tempo.
Cambiouse a calificación dos terreos ó lado do Concello para posibilitar a construcción do aparcadoiro: dende o grupo de goberno recoñeceuse a pouca viabilidade desta posible obra pola falta de interese da iniciativa privada.
Aprobouse solicitar da Consellería de Asuntos Sociais financiamento dentro do 'Plano Concertado 2005' para diversos programas que inclúen a construcción dun Centro de Día, dotacións e persoal.
Acordouse a adhesión ó convenio entre a SGAE e a FEMP para abaratar os custos das liquidacións dos dereitos de autor.
Aprobouse unha moción do PSdeG sobro do 'Día Internacional da Muller Traballadora'.

Resumindo, un pleno de xestión sen excesiva polémica.

Rede de saneamento

2005-03-18T13:04:00.000+01:00

No pleno de onte (17 de marzo) aprobouse a conformidade para o proxecto das obras da nova rede de colectores. Lamentouse que o anterior proxecto, redactado por Aquagest, fora rexeitado por Augas de Galiza cando costou 10 millóns de pesetas.

Co novo proxecto os custos da instalación dispáranse o que fai que este ano só se vaia abordar un tramo de 1,5km, que custará 2 millóns de euros, e que non abrangue as zonas máis conflictivas da vila.

Nós solicitamos do alcalde un compromiso de que esta obra non ía afectar ás tarifas que actualmente se cobran por este servizo e el comprometeuse a que así fora.

Acto público sobre o Tratado Constitucional

2005-02-18T23:15:00.000+01:00

Hoxe ás 20:30 horas celebramos no Hotel Xinzo una acto público informativo acerca da nosa visión do Tratado polo que se establece unha Constitución para Europa que se vota en referendo este vindeiro domingo día 20.

En primeiro lugar intervín eu, e despois de saudar ós asistentes e agradecer a presenza do noso convidado Francisco García, fixen unha breve valoración sobre o proceso de alumbramento desta Constitución e diversos aspectos relacionados con ela.

A continuación Paco debullou polo miúdo e argumentou os motivos polos cales este tratado non é aceptable dende un punto de vista galego e nacionalista. Unha vez finalizada a súa intervención procedeuse a abrir un pequeno turno de preguntas no cal algúns dos asistentes aproveitaron para resolver dúbidas sobre o tratado.

Orzamentos 2005

2005-01-26T22:30:00.000+01:00

No pleno extraordinario celebrado o día de hoxe (26 de xaneiro) foron aprobados, cos votos a favor do PP, os orzamentos do Concello para este ano.

A cifra total é de 6,73 millóns de euros, o cal supón un record absoluto na historia de Xinzo.

Dentro dos gastos os capítulos máis salientables son:

Gastos de persoal: 2.235.000 euros
Gastos correntes: 1.330.000 euros
Inversións: 2.373.000 euros

Un dos aspectos máis polémico destes orzamentos é o que se refire á venda de dúas parcelas para pagar débeda de exercicios anteriores. Imos explicar este punto detidamente.

Dentro dos ingresos recóllense 702.000 euros provintes da venda de dúas parcelas do Concello (Parcela Parque Empresarial: 102.000eu + Parcela Coren: 600.000eu), estes ingresos adícanse integramente a pagar facturas pendentes. Legalmente os ingresos provintes da venda de patrimonio só se poden invertir na merca de novo patrimonio, aquí é onde aparecen as interpretacións xa que dende o grupo de goberno (co aval dun informe técnico emitido polo interventor do Concello) consideran que as obras ás que se refiren esas facturas son patrimonio. Isto é, cando menos, opinable e, de feito, dende o PSOE xa anunciaron que presentarán un recurso por este motivo.

Nós estamos en contra destas operacións por principio, independentemente da súa legalidade, xa que consideramos que desprenderse de patrimonio de todos non é a solución para sanear a débeda, e máis neste caso no que esta operación non vai acompañada dunha política global de austeridade e a reducción ven unicamente por este capítulo.

Con todo isto, se descontamos estes 702.000 euros do capítulo de inversións, quédannos 1.671.000 euros para inversións "reais" no 2005, deste xeito queda desvirtuado un dos principais titulares do PP no senso de que este era o ano en que, por vez primeira, as inversións superaban ós gastos de persoal.

Unha vez explicado todo o anterior imos nomear, a título informativo, as principais inversións previstas para este ano. Son as seguintes:

Gardería Infantil: 699.000eu
Escola Obradoiro O Toural: 241.000eu
Ampliación Concello: 120.000eu
Parque de Bombeiros (Aportación 2005): 135.000eu
Piscinas (1ª fase): 60.000eu
Arranxo Rúas Sta. Mariña e da Sé (Plans Deputación): 165.000eu
Reforma escolas, depuradoras, arranxo A Moreira, etc.

Como vedes bótanse de menos algúns proxectos anunciados a bombo e platillo na campaña eleitoral e nestes últimos meses: Multiusos, saneamento, paneis solares na Moreira, paseo ó longo do río, etc. a explicación ofrecida polo Sr. Alcalde foi que nestas obras non participa o Concello por iso non aparecen recollidas nos orzamentos.

Ben, para rematar, por todos estes motivos e por algúns outros de menor calado e que resultaría moi longo explicar o noso voto foi negativo a estes orzamentos.

Moción urxente para axuda ás vítimas do maremoto

2004-12-30T23:20:00.000+01:00

No pleno do 30 de decembro do 2004 presentamos unha moción urxente instando á alcaldía a que se implicara activamente no envío de axuda humanitaria ás vítimas do maremoto no sureste asiático.

A moción foi recollida e aceptada por tódolos grupos e aprobouse coa modificación proposta polo PSdeG de concretar esa axuda nun 0,7% do orzamento do Concello.

Documentos adxuntos:

Texto íntegro da moción

Pleno ordinario decembro 2004

2004-12-30T22:50:00.000+01:00

O derradeiro pleno do 2004 foi de trámite. Non había ningún punto da orde do día especialmente problemático, aínda así a proposta de obras do grupo de goberno do PP para os Plans Provinciais do 2005 deu pé a lembrar, outra volta, o abandono no que se atopa o proxecto do Museo do Entroido. Para estas obras, que financia a deputación, o alcalde propuxo o empedrado das rúas Santa Mariña e Sé. Dende o PSOE propúxose unha alternativa, coa que nós concordabamos, de adicar cando menos 60 mil euros para o Museo do Entroido. Ó final non foi adiante porque ó grupo do PP parécelle "ridícula" para a importancia das obras a realizar.

Por outra banda aprobouse unha operación de crédito do 300.000 euros que deixou en evidencia a pobre xestión do actual goberno, xa que non poidemos acollernos á oferta máis ventaxosa obxectivamente pola premura de tempo para poder concretala.

Outros puntos que resultaron aprobados foron:

Ordenanza fiscal do servizo de ensinanzas no Conservatorio de Música e na Escola Municipal de Gaitas, que ven a regularizar a situación actual.
Moción do Grupo Socialista relativa á Lei Integral contra a Violencia de Xénero.

Adxudicación dos nichos do novo cemiterio

2004-12-29T20:45:00.000+01:00

Hoxe (29.12.04) celebrouse un acto no Concello para adxudicar os nichos do novo cemiterio. Alí nos xuntamos os portavoces e grande número dos interesados, mais a cousa non se puido levar a cabo pola inconcreción dalgúns aspectos importantes, fundamentalmente:

O sistema de adxudicación non estaba claro para os veciños: vai ser por orden de lista, cada veciño ten un número nesa lista e os nichos están tamén numerados así que o número 1 elexirá o seu nicho, e así sucesivamente.
O prazo de cesión: parece ser que por lei non se poden ceder a perpetuidade, así que en principio a cesión sería por 99 anos. Este é un extremo que non gusta ós veciños así que haberá que buscar forma de amañalo. Vontade política por parte dos grupos da corporación existe.

En definitiva, aplazouse o asunto para unha vindeira xuntanza a concretar no mes de xaneiro.

Moción camión de loita contra o lume

2004-12-03T11:00:00.000+01:00

Ó fío da polémica dos últimos días e, dada a inquietude e malestar que circula entre os veciños, dende o BNG propuxemos unha moción para solicitar con caracter de urxencia un camión axeitado para a loita contra incendios en medio urbán que paliara mínimamente esta carencia mentres non se remata o anunciado Parque de Bombeiros, que aínda está por comezar e que non chegará ata o 2006, se todo vai ben.

Esta moción foi rexeitada en comisión polo grupo de goberno do PP.

Documentos adxuntos:

Texto íntegro da moción

Museo do Entroido

2004-12-02T10:35:00.000+01:00

A situación actual do Museo do Entroido é lamentable: pechado e sin fondos para expoñer. O seu futuro tamén é bastante incerto, foi rexeitada a financiación do Interreg e agora vaise presentar unha nova solicitude ó Leader que, de resultar aprobada, apenas chegaría para uns pequenos arranxos.

A estas alturas parece pouco probable que, dada a situación económica do Concello e sen axuda doutras institucións, se vaia a materializar un proxecto que estaba cuantificado en máis de 2 mil millóns das antigas pesetas.

Sería unha mágoa que unha idea pioneira en Galiza e tan interesante dende o punto de vista cultural e de promoción turística, rematase esquecida nun caixón por culpa da nula vontade e interese amosados polo grupo de goberno do PP que, circunstancialmente, rixe os nosos destiños.

Estrada de Celanova

2004-12-02T10:29:00.000+01:00

Os veciños desta rúa solicitan do Concello que se lle dea unha solución ó problema actual de circulación nesta vía. Eles propoñen dúas alternativas:

Árbores máis cativas nas dúas beirarrúas e estrada central.
Fila única de árbores central e calzada e beirarrúas a ámbalas dúas beiras.

Calquera destas opcións pasa pola 'supresión' das árbores actuais. A polémica está servida. ¿Alguén propón outras alternativas? ¿Pódese achar algunha solución que contente a todos?. Opinións, por favor.

Incendios e Bombeiros

2004-11-21T10:15:00.000+01:00

Estos días anda a xente algo revolta porque xa imos polo terceiro incendio en poucos meses e dende o Concello non se toman medidas.

No pleno do día 15 aprobouse a cesión dunha parcela á beira dos Institutos para ubicar alí o futuro Parque de Bombeiros (para o cal aínda falta un rato largo). O grupo de CG presentou unha moción urxente para que se tomaran medidas xa, como solicitar un camión adecuado e persoal cualificado. O grupo de goberno rexeitou a urxencia da moción co argumento de que "co Parque de Bombeiros xa está o tema solucionado". Dous días despois pasou o que pasou.

Nun primeiro intre os tres grupos da oposición (PSdeG, CG e nós) concordamos na urxencia de solicitar un pleno extraordinario para debatir a cuestión, con dous obxectivos:

Esixir responsabilidades ó goberno e ó propio alcalde.
Debatir e poñernos dacordo nas medidas urxentes a adoptar.

O propio alcalde, obrigado polas circunstancias, realizou algunhas "xestións" para apaciguar os ánimos e anunciou o sábado 20 que xa estaba concedido un camión bomba. En calquera caso a "solución" é insuficiente e inconcreta, polo cal non se descarta finalmente a convocatoria do pleno.

Comisións Informativas

2004-11-21T01:00:00.000+01:00

Supoño que xa saberedes que no último pleno foi aprobada a nova distribución das Comisións Informativas. Esta modificación ven imposta pola sentencia do TSXG que obliga a un reparto máis proporcional logo de que o PSOE recurrise a composición inicial.

A cousa queda do seguinte xeito:

C.I. de Economía, Facenda e Especial de Contas: PP 3, PSdeG 1, CG 1, BNG 1.
C.I. de Urbanismo, Obras e Vivenda: PP 3, PSdeG 1, CG 1, BNG 1.
C.I. de Réxime Interior, Persoal e Asuntos Sociais: PP 3, PSdeG 1, CG 1, BNG 1.
C.I. de Sanidade, Consumo, Comercio e Medio Ambente: PP 3, PSdeG 1, CG 1, BNG 1.

C.I. de Agricultura, Desenvolvemento Rural, Muller, Xuventude e Tráfico: PP 4, PSdeG 2, CG 1.
C.I. de Cultura e Turismo: PP 4, PSdeG 2, CG 1.
C.I. de Asuntos Educativos e Deportes: PP 4, PSdeG 2, CG 1.

Como podedes ver "quedamos fóra" das tres últimas, en realidade imos estar, pero sen dereito a voto e sen percibir as cantidades que legalmente nos correspondería. Despois de meditalo, decidimos aceptar esta situación para non xudicializar a vida do Concello e así concentrarnos en temas verdadeiramente interesantes para os veciños.

En calqueira caso pode ser unha situación temporal, xa que está pendente un recurso sobre esa sentenza que, en caso de resultar favorable, nos devolvería ó estado anterior.

Esta situación é conseguencia dunha guerra entre PP e PSOE na que nós resultamos os máximos perxudicados. Habería unha solución: 1 representante de cada grupo e voto ponderado, que sería ideal, mais o PP tería que renunciar ós ingresos que lle reporta a maioría. A outra posibilidade: representación proporcional, aplicada estrictamente faría que as comisións fosen plenos.

Ramiro

Encetando...

2004-11-20T13:30:00.000+01:00

Saúdos para tod@s,

Hoxe estreamos unha nova ferramenta que vai permitir mellorar as canles de comunicación con todos vós. Mediante este blog pretendo mantervos o máis informados posible de todo o que acontece na vida diaria do Concello de Xinzo e recibir dun xeito rápido e sinxelo as vosas opinións, suxerencias, críticas e colaboracións para facer do Bloque Nacionalista Galego de Xinzo de Limia unha forza máis aberta e máis próxima se cabe a tódolos militantes, simpatizantes e veciños en xeral.

Apertas nacionalistas,

Ramiro Rodríguez Suárez
Concelleiro